Ս. Ղևոնդեանց քահանաներու անուան տակ կը ճանչցուին Յովսէփ կաթողիկոս, Սահակ եւ Թաթիկ եպիսկոպոսներ, Ղեւոնդ, Մուշէ, Արշէն, Սամուէլ քահանաներ, Քաջաջ եւ Աբրահամ սարկաւագներ եւ այլ հոգեւորականներ։
Ղեւոնդեանց քահանայից տօնը կը տօնուի Վարդանանց տօնի նախորդող Երեքշաբթի օրը, որ նաեւ տօնն է բոլոր քահանաներուն:
Պարսից Յազկերտ Բ. թագաւորը, Վարդանանց պատերազմէն ետք, Հայաստանի մէջ ապստամբական նոր խլրտումներ կանխարգիլելու համար, կարգ մը կասկածելի նախարարներու հետ հոգեւորականներն ալ արգելափակեց: 454-ի Քուշանաց դէմ պատերազմի պարտութենէն ետք, Յազկերտ թագաւորը արգելափակուածներէն իւրաքանչիւրը տարբեր ձեւով սպաննեց:
Ղեւոնդեանք հայ եկեղեցականութեան պարծանք ներշնչող սուրբերն են: Հայրենիքի եւ հաւատքի նկատմամբ նուիրումի գաղափարը Ղեւոնդեանք տուին իրենց անձնական օրինակով:
Սբ. Ղևոնդեանց քահանաներու յիշատակութեան այս տարուայ տօնը կը զուգադիպի փետրուարի 21-ին:
Ս. Ղեւոնդեանց քահանաները քաջայաղթ վկաներ էին, որոնք պայքարեցան քրիստոնէական հաւատքի պահպանման եւ հայրենիքի անվտանգութեան համար: Անոնք աննուաճ կամքով եւ հաստատուն կեցուածքով մերժեցին կրօնափոխ ըլլալ, աւելին` միանալով հայոց բանակին, արիութեամբ վճռեցին մնալ հաւատարիմ կողմնակիցները Քրիստոսի եւ ուխտապահ հայորդիները Հայաստան աշխարհի: Հայոց բանակին մղած պատերազմը կ՛ապացուցէր, թէ կրօնասիրութիւնն ու հայրենասիրութիւնը պարզապէս զգացական վիճակ չէր, այլ` խոր գիտակցութեամբ արտայայտուած ապրելակերպ մը, հզօր ոյժ մը, որուն դիմաց պիտի տապալէր հաւատուրացութիւն պարտադրող պարսկական բոլոր տեսակի սպառնալիքները:
All the contents on this site are copyrighted ©. |